Þrítugur Íslendingur hefur verið ákærður í Kanada fyrir þrjú brot er varða barnaníðsefni. DV greinir frá málinu í dag sem og nafni mannsins en hann heitir Jóhann Scott Sveinsson. Þar kemur fram að Jóhann, sem á föður og skoska móður, er búsettur í borginni Abbotsford í Bresku-Kólumbíu en vísað er í umfjöllun staðarmiðilsins Abbotsford News.
Jóhann Scott átti að mæta fyrir dóm vegna málsins þann 6. nóvember síðastliðinn en mætti ekki og því hefur lögreglan þar ytra gefið út handtökuskipun á hendur honum. Er hans nú leitað. Þá segir enn fremur í umfjöllun Abbotsford News að Jóhann Scott sé grunaður um innflutning og dreifingu á barnaklámi í júní 2022 og janúar 2023 auk þess að hafa haft í fórum sínum barnaklám í maí á þessu ári.
Rætt er við upplýsingafulltrúa lögreglunnar í Abbotsford en þar segir að rannsókn lögreglu hafi hafist í mars á þessu ári og að sérstök stórglæpasveit hafi, með sleitulausri rannsókn og leitarheimildum, komist að því að Jóhann Scott væri maðurinn á bakvið dreifingu barnaklámsins.
DV greinir frá því að Jóhann hafi starfað við kvikmyndagerð hérlendis, sé giftur íslenskri konu og að þau eigi barnungan son saman.