Breska sykursnúðarnir í hljómsveitinni Lawson komu til landsins 10. nóvember og dvöldu hér í rúma viku við upptökur á nýju efni ásamt því að taka upp tónlistarmyndband, eftir því sem Nútíminn kemst næst.
Adam James Pitts, meðlimur hljómsveitarinnar, kvartaði undan kulda þegar hljómsveitin dvaldi hér á landi. Hann birti mynd af sér í þremur jökkum á Instagram í gær, sem hann sagði vera til að verja sig frá kulda.
Myndin var þó ekki tekin í gær þar sem hljómsveitin hefur nú yfirgefið landið.
Fleiri myndir frá Íslandsferðinni má finna á Instagram-síðu Pitts.
Þetta er nokkuð fyndið í ljósi þess að ef hlýindi undanfarinna daga halda áfram gæti meðalhiti í nóvember orðið hærri en meðalhiti í nóvember síðastliðin tíu ár. Það sem af er nóvember hefur meðalhiti í Reykjavík mælst 5,12 stig sem er tæpum þremur gráðum hærra en meðalhiti í mánuðinum síðustu tíu árin.
Þá segir á veðurbloggi Trausta Jónssonar veðurfræðings að meðalhiti í Reykjavík það sem af er ári sé mjög nálægt því að vera sá mesti frá árinu 1949. Haldi hlýindin sem hafa verið síðustu daga áfram gæti metið frá árinu 2003 því fallið.
Lawson býtur talsverðra vinsælda á Bretlandi. Hljómsveitin var stofnuð árið 2009 og gaf út fyrstu plötu sína árið 2012. Platan náði fjórða sæti breska vinsældarlistans. Lög hljómsveitarinnar hafa einnig farið hátt á vinsældarlistum en það síðasta, Juliet, náði þriðja sæti.
Hægt er að hlusta á lagið hér fyrir neðan.