Lögregla var kölluð til í World Class á Seltjarnarnesi í dag eftir að kona neitaði að eyða sjálfu sem hún hafði tekið í búningsklefa stöðvarinnar. Inni á myndinni var líka önnur kona sem var fáklædd og krafðist hún þess að myndinni yrði eytt.
Isabella Ósk Másdóttir var í sturtu þegar konan tók myndina en varð vitni að samskiptum kvennanna. Konan sem lenti inni á myndinni fékk að sjá hana og bað í kjölfarið þá sem tók sjálfuna að eyða henni. Sú síðarnefnda harðneitaði.
Starfsmenn World Class reyndu að leysa málið en á endanum var ákveðið að kalla til lögreglu. Þegar Isabella yfirgaf svæðið var verið að taka skýrslu af konunni sem tók sjálfuna.
Myndatökur eru ekki leyfðar í búningsklefum World Class.
Nútíminn hafði samband við skrifstofu World Class. Þar vildi enginn tjá sig um málið.