Ólíklegt þykir að maðurinn sem féll í Gullfoss í gær sé erlendur ferðamaður en það er Mbl.is sem greinir frá því nú í morgun. Vísbendingar um bíl, sem talinn er vera í eigu mannsins benda til þess að svo sé ekki. Þetta staðfesti Sveinn Kristján Rúnarsson yfirlögregluþjónn í samtali við mbl.is.
Lögreglan vinnur nú að því að ræða við fólk sem tengist umræddum bíl og er talið að hægt sé að staðfesta hver maðurinn er innan tíðar.
Eins og greint var frá í gær féll maður í Gullfoss laust fyrir klukkan fimm. Björgunarsveitir voru kallaðar út skömmu síðar, ásamt þyrlu landhelgisgæslunnar sem tók einnig þátt í leitinni. Leit var hætt rétt eftir miðnætti í gær en hófst aftur á níunda tímanum í morgun. Hátt í 200 björgunarsveitarmenn af Suðurlandi og höfuðborgarsvæðinu tóku þátt í leitinni í gær sem bar engan árangur.