Steinar Bragi segist ekki vera hulduhöfundurinn Eva Magnúsdóttir. Skellur.
Eins og Nútíminn fjallaði um fyrr í vikunni þá blekkti Forlagið blaðamann Fréttatímans til að taka viðtal við rithöfund sem er ekki til.
Höfundur bókarinnar Lausnin, sem kom út á dögunum, er sagður heita Eva Magnúsdóttir en viðtalið í Fréttatímanum var tekið í gegnum tölvupóst. Manneskjan á bakvið Evu gat því skáldað upp lygilegt lífshlaup hennar.
Marta María Jónasdóttir greindi frá því á mbl.is í vikunni að rithöfundurinn Steinar Bragi sé Eva Magnúsdóttir. Í svari við fyrirspurn Fréttatímans segist Steinar Bragi ekki vera Eva. „Þótt Marta Smarta sé eflaust sæmilega læs er ég ekki Eva,“ segir hann.
Þótt sjálfur páfinn lýsti Evu á hendur mér myndi það engu breyta, ég er ekki Eva. Hins vegar hef ég skrifað bækur undir höfundarnafninu Steinunn Sigurðardóttir í mörg ár!
Marta María sagði í frétt sinni að það hafi verið nokkur merki sem komu Smartlandi Mörtu Maríu á sporið.
„Eitt af þeim var að textinn í Lausninni er keimlíkur textanum í Konum eftir Steinar Braga sem kom út 2008,“ segir Marta María.
Sjá einnig: Forlagið plataði blaðamann Fréttatímans, Eva Magnúsdóttir er ekki til
Vefsíðan Druslubækur og doðrantar hafði einnig velt því upp að Steinar Bragi gæti verið höfundur Lausnar.
Textafræðideild Druslubóka og doðranta rýndi í brot úr bókinni sem finna má á vef Forlagsins og komst að þeirri niðurstöðu að bæði í stíl og efnistökum mætti sjá ýmsar eindregnar hliðstæður við verk höfundarins Steinars Braga.
Á síðunni er því einnig velt upp hvort Eva Magnúsdóttir sé mögulega persóna í næstu bók Steinars Braga.