Hljómsveitin Kaleo er stödd í hljóðveri í Lundúnum við uuptökur á nýju efni. Sveitin vinnur þar með breska upptökustjóranum Mike Crossey. Þetta kemur fram í Fréttablaðinu í dag.
Sjá einnig: Jökull í Kaleo of myndarlegur fyrir Kate Moss
Crossey er þekktastur fyrir að hafa stýrt upptökum á tveimur fyrstu plötum hljómsveitarinnar Arctic Monkeys. Hann hefur einnig unnið með hljómsveitum á borð við Foals, Keane, The Kooks og Razorlight.
Jökull Júlíusson, söngvari og gítarleikari Kaleo, segir í samtali við Fréttablaðið að Crossey sé mikill fagmaður:
Við erum að prófa að vinna með Crossey og sjáum svo hvað kemur út úr því. Þetta er mikill fagmaður og við hlökkum til samstarfsins.
Kaleo er flutt til Bandaríkjanna fyrr í janúar þar sem hún verður á ferð og flugi næstu mánuðina við að kynna tónlist sína.
Eins og Nútíminn greindi frá á dögunum hefur hljómsveitin gert plötusamning við Atlantic Records um alþjóðlega útgáfu verka sinna. Í Morgunblaðinu kom fram að unnið sé að því að koma hljómsveitinni á framfæri í kvikmyndum, auglýsingum og sjónvarpsþáttum vestanhafs.