Viðskiptavinir Costco drösla níðþungum kerrum yfir gras hjá IKEA til að spara sér 20 metra göngu

Auglýsing

IKEA hefur brugðið á það ráð að strengja bönd á milli tréstaura við bílastæði verslunarinnar í Kauptúni til að bregðast við aukinni slysahættu og reyna að hlífa gróðri sem hefur breyst í forarsvað. Viðskiptavinir Costco stytta sér ítrekað leið yfir grasið með níðþungar innkaupakerrur og spara sér þannig 20 til 30 metra göngu.

Allt frá því að verslun Costco var opnuð í lok síðasta mánaðar hafa viðskiptavinir lagt bílum sínum hér og þar í Kauptúni; meðal annars hjá Bónus, IKEA og Toyota, þar sem ekki hafa verið nógu mörg stæði hjá Costco. Fyrst um sinn lét gróðurinn við IKEA ekki mikið á sjá, enda glaðasólskin og engin úrkoma. Í síðustu viku fór síðan að rigna og varð grasið þá fljótt að forarsvaði, sérstaklega á svæðinu sem er styst frá Costco.

Þórarinn Ævarsson, framkvæmdastjóri IKEA, segir í samtali við Nútímann að viðskiptavinir Costco spari sér um 20 til 30 metra göngu með því að drösla innkaupakerrunum yfir grasið. Markmiðið með böndunum sem nýlega voru sett upp er að hvetja fólk til að nýta sér göngustíginn sem liggur að gangbraut í stað þess að fara yfir grasið og beint út á götu. Þannig vonast IKEA ekki aðeins til þess að grasið nái að vaxa og dafna, heldur einnig til þess að ekki verði slys á bílastæðinu.

Þórarinn á ekki von á því að þurfa að smíða grindverk og leysa þannig bráðabirgðalausnina af hólmi, heldur gerir hann ráð fyrir að smá saman dragi úr aðsókinni í Costco. Þá geti viðskiptavinir lagt fyrir framan búðina og grasið við IKEA fái að vera í friði.

Auglýsing

Hann segir að IKEA taki nýju nágrönnunum fagnandi og samstarfið hafi verið ágætt hingað til. Mikið er að gera á veitingastaðnum og ekki síður í versluninni og því ljóst að fólk verslar ekki eingöngu í Costco þessa dagana.

Auglýsing

læk

Ummmmm...

Kjúklinga Alfredo Pizza

Spaghetti Carbonara

Instagram