Tónlistarkonan Soffía Björg var að senda frá sér lagið Heyholt. Lagið samdi hún við ljóð Hallmars Sigurðssonar heitins.
Hallmar samdi ljóðið þegar hann háði baráttu við krabbamein og bað hann Soffíu um að semja lag við ljóð hans. Hún flutti lagið seinna við jarðarför Hallmars árið 2017.
Ljóðið fjallar um sáttina við lífið og dauðann en Hallmar var óhræddur við að ræða slík mál.
“Ég vildi að lagið myndi hljóma eins og hestaferð á fallegum sumardegi. Þær stundir minna mig á Halla. Ég hef þekkt hann síðan ég man eftir mér og var það venja hjá okkur í fjölskyldunni að fara í eina góða hestaferð á sumri. Svo þegar komið var á áningarstað var eldaður góður matur og hljóðfæri dregin fram þar sem sungið var frameftir kvöldi. Halli var líka með þeim fyrstu til þess að koma auga á að það gæti leynst listrænt bein í mér. Og síðan þegar ég byrjaði að gefa út efni þá hafði hann alltaf samband og hrósaði og hvatti mig áfram,” segir Soffía.
Soffía Björg sá um upptökur, söng og flestan hljóðfæraleik, Guðmundur Bergmann Óðinsson spilar á munnhörpu og Janus Rasmussen sá um hljóðblöndun. Þetta kom fram á vef albumm.is