Starfskonur auglýsingadeildar sjónvarpsstöðvarinnar iSTV voru beðnar um að fara í stutt pils, háa hæla, setja upp brjóstin, fara í flegnar skyrtur og fara þannig með samninga til þeirra sem þurftu að skrifa undir. Þetta kemur fram á Mbl.is.
Jóna María Hafsteinsdóttir, fyrrverandi starfsmaður iSTV, segir að Þorsteinn Steingrímsson, stjórnarformaður stöðvarinnar, hafi borið upp fyrrgreinda bón þegar honum fannst sem ekki hefði tekist nógu vel að selja auglýsingapláss.
Á Mbl.is kemur fram að starfsfólk auglýsingadeildarinnar hafi brugðist illa við bóninni og spurt Þorstein hvort hann vildi ekki fremur ráða inn gleðikonur. Hann sagðist vel getað hugsað sér það.
Þorsteinn staðfestir þetta í viðtali á Mbl.is og segist hafa tekið starfsmenn auglýsingadeildarinnar á teppið vegna lélegs árangurs.
Ég sagði við þær að annað hvort væru þær ómögulegar sölukonur eða að gera hlutina rangt. Maður hefur sig huggulegan og gerir sig til fyrir viðskiptavininn. Þá spurðu þær hvernig ætti að gera það. Ég sagði að maður þyrfti að vera í huggulegum klæðnaði. Þið þurfið að dressa ykkur upp sagði ég. Jafnvel að vera í stuttum pilsum. Þetta sagði ég og meina það og dreg ekkert úr því.
iSTV fór upphaflega í loftið 17. júlí en útsendingarbúnaðurinn bilaði tveimur dögum síðar. Hún fór svo aftur í loftið 28. júlí.
Í september hættu svo framkvæmdastjóri, markaðsstjóri og dagskrárstjóri sjónvarpsstöðvarinnar, þeir Jón E. Árnason, Björn T. Hauksson og Guðmundur Týr Þórarinsson, og báru við trúnaðarbresti og samstarfsörðugleikum við stjórn og aðaleigendur sjónvarpsstöðvarinnar.