Helena Natalía Albertsdóttir fékk ekki að greiða fyrir mat með 10 þúsund króna seðli í Hagkaup í Garðabæ um helgina. Starfsmaðurinn á búðarkassanum sagði að slíkur gjaldmiðill væri ekki til og því væri ekki hægt að taka við seðlinum. Þetta kemur fram á mbl.is.
Tíu þúsund króna seðillinn fór fyrst í umferð hinn 24. október 2013. Helena segir í samtali við mbl.is að hún hafi ekkert skilið í þessu.
Ég var að kaupa í matinn og ætlaði að borga þegar kassastrákurinn spurði mig hvort þetta væri eitthvað djók. Ég hef aldrei verið með tíu þúsund króna seðil áður en fékk hann frá bankanum og skildi því ekkert í þessu.
Hún segir að starfsmaðurinn á kassanum hafi verið harður á því seðillinn væri ekki löggildur gjaldmiðill.
„Og ég geng út með engan mat, haldandi að ég væri með einhvern gervipening,“ segir Helena á mbl.is.
Grétar Ingi Sigurðsson, verslunarstjóri Hagkaups í Garðabæ, segir í samtali við mbl.is að verslunin taki við tíu þúsund króna seðlum. Hann kannaðist ekki við málið.