Eftir að hafa fylgst með þingmanninum Óttarri Proppé, sem nú er orðinn heilbrigðisráðherra, síðustu mánuði ákvað Auður Björk Þórðardóttir að hekla teppi í stíl við hann.
Hún valdi gult, brúnt, svart og ljóst garn í Álafossbúðinni og hófst handa.
Óttarr hefur oft klæðst gulum jakkafötum og skartar hann brúnu skeggi. Hárið er ljóst og er hann gjarnan í svartri rúllukragapeysu undir jakkanum.
Sjá einnig: Óttarr skipti gulu fötunum út fyrir grænan jakka: „Grámyglan getur alveg verið gul“
Töluverða athygli vakti þegar hann mætti í grænum jakka í leiðtogaumræður í beinni útsendingu á RÚV eftir Alþingiskosningarnar.
Auður Björk segist hafa heillast af litasamsetningu Óttarrs. „Mér finnst hann einnig litrík og skemmtileg manneskja,“ segir hún í samtali við Nútímann.
„Þegar ég geri handverkið mitt vel ég oft litina eftir því í hvernig stuði ég er. Þennan dag sem ég fór í Álafossbúðina til að velja mér garn í næsta verk var ég bara í Proppé-stuði,“ segir Auður Björk.
Hún setti sér það markmið að ljúka við teppið áður en ný ríkisstjórn tæki við.
„Það gladdi mig að að hann hafi tekið við embætti heilbrigðisráðherra og á mánudagskvöldið þegar ég var að ganga frá endunum á teppinu ákvað ég að bíða með að klára teppið þangað til að Proppé tæki við lyklavöldunum. Ég vona að honum og nýrri ríkisstjórn vegni vel í framtíðinni,“ segir Auður Björk.