212 Volvo XC90-jeppar hafa selst á árinu, samkvæmt tölum frá Samgöngustofu. Í dag er 249. dagur ársins þannig að Íslendingar eru ekki langt frá því að kaupa einn Volvo XC90-jeppa á dag á þessu ári.
Volvo XC90 er flaggskip sænska bílaframleiðandans og var valinn bíll ársins á Íslandi í fyrra. Bandalag íslenskra blaðamanna stendur fyrir valinu en þetta var í þrettánda skiptið sem verðlaunin eru afhent.
Í upplýsingum um jeppann á vef Brimborgar kemur fram að Volvo XC90 sé stórglæsilegur sjö manna lúxusjeppi með öllu því besta frá Volvo. „Volvo vann í fjögur ár að þróun hans og fjárfest var fyrir meira en 11 milljarða dollara í verkefninu,“ segir þar.
„Samhljómur er á milli allra þátta, milli áferðar leðurs og viðarklæðningar. Natnin sem býr að baki hönnuninni á Volvo XC90 endurspeglast m.a. í gírstöng úr kristal og loftkældum framsætum, innblásin af formi mannslíkamans, með nuddbúnaði og fjögurra þrepa rafknúnum stuðningi við mjóbak.“
Margir hafa bent á líkindin við sölu á Range Rover árið 2007. Til dæmis á Twitter
Samkvæmt íslenskum bílasérfræðingum þá er VOLVO XC90 góðærisbíllinn 2017 rétt eins og Range Rover Sport var það 2007. Stórglæsilegur bíll. pic.twitter.com/LkHDz6jWly
— Brennslan (@BrennslanFM) March 21, 2017
Er komin einhver prósenta á það hversu margir keyra um á Volvo XC90? Tippa á 75% af landanum.
— Gunnar Birgisson (@grjotze) July 21, 2017
Það er ekki úr lausu lofti gripið. 90 nýir Volvo XC90 hafa selst á árinu en 122 notaðir hafa verið fluttir inn og skráðir hér á landi eftir að hafa verið skráðir í öðru landi. Til samanburðar þá höfðu 88 nýir Range Rover-jeppar selst í lok ársins 2007.