Um hvað snýst málið?
Þann 1. október næstkomandi breytist SkjárEinn í gagnvirka efnisveitu fyrir áskrifendur. Sjónvarpsstöðin verður aðgengileg notendum í opinni línulegri dagskrá án endurgjalds.
Hvað er búið að gerast?
SkjárEinn fór í loftið árið 1999 og var í opinni dagskrá til ársins 2009. Þá var tekið upp áskriftarfyrirkomulag sem hefur verið frá þeim tíma.
Orri Hauksson, forstjóri Símans, segir í Morgunblaðinu í dag að neytendur vilji ekki láta stýra því hvenær þeir horfi á sjónvarpsefni og línulegar áskriftarstöðvar eiga undir högg að sækja.
Með breytingunum séu Síminn og SkjárEinn að fylgja þróuninni eftir, þar sem notendur fá ókeypis aðgang að takmörkuðum hluta þjónustunnar með möguleika á að greiða fyrir meiri þjónustu.
Við stígum þetta skref með neytendum núna, en finnum síðan út í gegnum neytendamynstrið hvað fólk vill helst.
Orri nefnir tónlistarveituna Spotify sem dæmi um slíka þjónustu.
Orri segir í Morgunblaðinu verðið fyrir SkjáEinn hjá Símanum, heimasíma, net, beini og sjónvarpsefni nema 12 þúsund krónum á mánuði. Horft sé til þess að ekki leynist falinn kostnaður í verðinu.
Hvað gerist næst?
Orri segir í Morgunblaðinu að þetta sé ekki endapunktur þróunarinnar. Mögulega verður notendum boðið upp á að horfa á sama efni og einstaklingar sem þeir þekkja eða fylgja horfa á, líkt og á Spotify.
Örskýringar eru 200 orða fréttaskýringar Nútímans um mál sem mikið er fjallað um. Sendu okkur póst ef þú ert með hugmynd að örskýringu.