Um hvað snýst málið?
Hjartaskurðlæknirinn Tómas Guðbjartsson sagði í fréttum á sunnudag að ástandið á Landspítalanum hafi aldrei verið verra.
Birgir Jakobsson landlæknir hafnar þessu.
Hvað er búið að gerast?
Fjárlagafrumvarp næsta árs var lagt fram á Alþingi fyrr í þessum mánuði.
Páll Matthíasson, forstjóri Landspítalans, lýsti yfir miklum vonbrigðum með framlagið til spítalans og sagði að það vantaði nokkra milljarða upp á.
Tómas ræddi við fréttamann RÚV á sunnudag og sagði stöðuna grafalvarlega og að hún hefði aldrei verið verri. Einnig var rætt við nokkra sjúklinga sem dvöldu ekki á stofum heldur á göngum og setustofum spítalans við Hringbraut.
Rætt var við Birgi í kvöldfréttum RÚV í gær og hafnaði hann því að plássleysið á Landspítalanum sé verra en nokkru sinni fyrr.
Sagði hann að ástandið í raun ekki mjög slæmt. Byggði hann þetta á úttekt sem embætti Landlæknis gerði eftir viðtalið við Tómas á sunnudag var birt.
Í morgun skrifaði Tómas færslu á Facebook-síðu sína þar sem hann sagði orð Birgis koma sér á óvart. Hann vísar því á bug að leiksýning hafi verið sett á svið á Landspítalanum.
Hvað gerist næst?
Fjallað er um fjárlagafrumvarpið í fjárlaganefnd. Ekki liggur fyrir hvenær það fer þaðan og til annarrar umræðu á Alþingi.
Örskýringar eru 200 orða fréttaskýringar Nútímans um mál sem mikið er fjallað um. Sendu okkur póst ef þú ert með hugmynd að örskýringu.