Frístund fyrir börn getur verið annasöm stund fyrir foreldra. Ekki að margir telji það eftir sér að taka virkan þátt í áhugamálum barnanna sinna en það getur skipt máli, fyrir vellíðan fjölskyldunnar í heild, að skuldbindingar áhugamálanna komi engum á óvart.
Svo hér eru nokkrar spurningar sem gott er að spyrja þegar upplýsinga er aflað um frístundastarf fyrir börn.
- Eru einhverjar skyldur eða kvaðir á foreldrum þátttakenda, s.s. mætingaskylda, nefndir eða foreldrafélag?
- Hver er aldur og reynsla kennara/þjálfara/umsjónarfólks, og eru þau á launum?
- Hver er stefna umsjónarfólks/félags/skóla þegar kemur að mótum og/eða sýningum?
- Hver er stefna umsjónarfólks/félags/skóla þegar kemur að styrktaraðilum eða beinni markaðssetningu gagnvart börnum?
- Hvaða mót, sýningar og/eða viðburðir (s.s. tónleikar) eru fyrirhugaðir og þá hvenær?
- Hvaða kostnað bera fjölskyldur af slíkum uppákomum? Er líklegt að einhver annar aukakostnaður en námskeiðsgjöld bætist við?
- Nauðsynlegur búnaður og/eða búningar, hver kostar hann og/eða annast?
- Er barnið tryggt í viðkomandi frístundastarfi?
- Er líklegt að börnin þurfi að safna styrkjum í þágu frístundastarfsins?
- Hvernig er formlegum samskiptum umsjónarfólks við foreldra háttað … sími, tölvupóstur, innranet, Facebook?
- Hvert ber að snúa sér ef forráðamenn hafa spurningar eða athugasemdir varðandi starfið?
Fáðu endilega upplýsingar sem þessar á hreint. Ef sá sem situr fyrir svörum á erfitt með að svara svona spurningum skýrt gæti það gefið vísbendingu um að hlutirnir sé ekki mjög í föstum skorðum, og þá er líklegra að eitthvað geti komið að óvörum síðar. Góðar upplýsingar, betri ákvarðanir, minna vesen.
Nútímaforeldrar eru líka á Facebook.
Lækaðu ef þér líkar síðan okkar og þá missir þú ekki af neinu.
Svo er dásamlegt að deila.