Bílalyftunni í Herjólfi var í gærkvöldi slakað á tvo bíla um borð með þeim afleiðingum að þeir skemmdust töluvert. Um slys var að ræða og var enginn farþegi staðsettur á bíladekkinu þegar slysið var. Frá þessu er greint í Eyjafréttum.
Þar er haft eftir Herði Orra Grettissyni að óhapp hafi orðið þegar skipið var á leið frá Landeyjahöfn í sína síðustu ferð í gær. Þegar Herjólfur var að koma sér úr höfn fór bílalyftan niður öðrum megin svo að tveir bílar urðu undir.
„Ástæðan fyrir óhappinu er sú að rekist var í takka sem staðsettur er í brú skipsins sem varð til þess að lyftan fór niður með þessum afleiðingum. Í kjölfar óhappsins verður gripið til ráðstafana til að tryggja að þetta geti ekki komið fyrir aftur.” segir Hörður.