Dregið var í áskrifendaleik Morgunblaðsins í gær. Vinningshafinn Ragnar Ólafsson hlaut glæsilegan sportjeppa af gerðinni Suzuki Vitara GLX, að verðmæti 5,4 milljóna króna. Morgunblaðið er búið að gefa áskrifendum sínum fjóra bíla á árinu að andvirði tæplega 22 milljóna króna.
Í febrúar voru hjónin Einar Guðmundsson og Ásdís Svava Hrólfsdóttir dregin úr potti áskrifenda og fengu glænýjan Volkswagen e-Golf að verðmæti 4,6 milljóna króna. „Hann sagði, ég held það sé bara að líða yfir mig og settist,“ sagði Ásdís um viðbrögð eiginmannsins í frétt um málið á mbl.is.
Í apríl vann svo Freyja Jónsdóttir glænýjan bíl af gerðinni Toyota Corolla í áskrifendahappdrætti Morgunblaðsins. Í frétt á mbl.is kom fram að bíllinn væri hlaðinn aukabúnaði og að verðmæti hans væri 4.899.000 krónur.
Í júli var svo dregið enn á ný í áskrifendahappadrættinu. Þá vann Hans Herbertsson glæsibifreið af gerðinni Mercedes-Benz B Class með fjórhjóladrifi og 7Gtronic sjálfskiptingu. Verðmæti vinningsins er tæpar sjö milljónir króna.
„Mig hefur alltaf dreymt um að eiga Benz. Kannski er þessi bíll þó í það minnsta. Við hjónin erum bæði í golfi og þurfum að koma fyrir tveimur golfkerrum, golfsettum og svona í bílnum. Við eigum eftir að tala við þá í Öskju um hvað við gerum,“ sagði Hans á mbl.is en hann hefur verið áskrifandi að Morgunblaðinu í meira en 40 ár.
Heildarverðmæti bílanna sem Morgunblaðið hefur gefið áskrifendum sínum á árinu er því um 22 milljónir króna.