Ekkert verður af því að risavatnsrennibraut verði komið fyrir á Skólavörðustíg í sumar eins og áætlað var. Ekki náðist að flytja rennibrautina inn til landsins í tíma. Þetta kemur fram á Vísi.
Eins og fram hafði komið á Nútímanum hafði skipulagsnefnd Reykjavíkurborgar gefið grænt ljós á 200 metra vatnsrennibraut á Skólavörðustíg. Rennibrautin átti að vera lögð í lok júlí.
Jökull Torfason, einn af þeim sem stóð að rennibrautinni, segir í samtali við Vísi að verkefnið hafi runnið út á tíma.
Kúrsinn sem við gerðum þetta í hófst ekki fyrr en í maí og það vannst bara ekki tími til að ná þessu.
Á Vísi kemur fram að flytja átti rennibrautina frá Asíu en hún tafðist í Hollandi og náði ekki alla leið. Fjarskiptafyrirtækið Nova ætlaði að taka átt í verkefninu og Guðmundur Arnar Guðmundsson, markaðsstjóri Nova, segir á Vísi að það sé leitt að geta ekki boðið upp á rennibrautina í ár.
Hann segir líklegra en ekki að reynt verði á ný á næsta ári.
Hér má sjá kynningarmyndband verkefnisins.