Jóhanna Guðrún verður sérstakur gestur á Andrea Bocelli tónleikunum.
„Það gleður okkur að tilkynna hér með að Jóhanna Guðrún mun stíga á svið með sjálfum Andrea Bocelli í Kórnum laugardaginn 27. nóvember,“ segir í tilkynningu.
Eins og allir vita er Jóhanna Guðrún ein þekktasta og virtasta söngkona Íslands og það var Bocelli sjálfur sem valdi hana til að taka með sér lagið í Kórnum í næsta mánuði.
„Þetta er mikill heiður enda er Bocelli einn allra besti söngvari heims og ég get ekki beðið eftir að fá að taka lagið með honum,“ segir Jóhanna Guðrún.
Eins og áður hefur komið fram er það staðfest að tónleikarnir geta loksins farið fram 27. nóvember. Og miðað við nýjustu fréttir má búast við því að þegar tónleikarnir fari fram verði engar hömlur til staðar. Ásamt Bocelli og Jóhönnu Guðrúnu kemur fram 70 manna sinfóníuhljómsveit frá SinfoniaNord og kór frá Söngsveitinni Fílahormóníu.
Það má því lofa ógleymanlegu kvöldi í Kórnum 27. nóvember og þar sem hér verður um fyrstu stórtónleikana á Íslandi að ræða eftir að faraldurinn skall á þá verður þetta stór stund fyrir Ísland.
Uppselt er í verðsvæði 2 og fáir miðar eru eftir í hinum fimm verðsvæðunum, en miðarnir kosta frá 12.990 kr.
Allt um tónleikana hér