Dr. Gunni sér eftir að hafa hætt við að fá Gylfa Ægisson til að syngja lag inn á plötuna Alheimurinn! sem kom út árið 2013. Hann biður Gylfa afsökunar í færslu á bloggsíðu sinni.
Gunni segist hafa hent Gylfa út af Alheims-plötunni á sínum tíma en hann fékk Sóla Hólm í staðinn til að herma eftir honum í laginu Brjálað stuðlag. „Ég drullusé eftir því í dag. Ég hefði bara átt að yppa öxlum og láta slag standa,“ segir Gunni.
Lagið var beisiklí samið á staðnum eftir að ég sá Gylfa Ægisson og karlgreyið hafði lagt á sig leið frá Vogum til Keflavíkur til að syngja lagið og segja okkur þrælskemmtilegar grobbsögur af sjálfum sér.
Gunni segir að nokkrum vikum síðar hafi Gylfi byrjað „þetta snargalna typpasleikjó-homma-rant sitt“.
„Og ég var bara eins og einhver vindhani í umræðunni og þurfti endilega að taka þessa bjánalegu ákvörðun. Sem ég drullusé eftir. Og vil biðja Gylfa Ægisson formlega afsökunar á hér og nú,“ segir Gunni.
Hann segist hafa farið að spá í issjúið „maðurinn vs list hans“ þegar Peter Sellers myndirnar um Bleika pardusinn voru í sjónvarpinu á dögunum.
„Öll fjölskyldan skellihló enda hafa þessar myndir elst vel og eru ennþá ógeðslega fyndnar. Samt var Sellers annálað skítmenni og hundleiðinlegur gaur,“ skrifar Gunni.
„Bítlarnir eru besta band í heimi en samt var John Lennon á einhverjum tímabilum algjört fífl sem lamdi konur. Og hermdi eftir fötluðum.“
Hlustaðu á umrætt lag hér fyrir neðan.