Vinkonurnar Svanhildur Valdimarsdóttir og Gígja Rún fengu sér ansi frumleg vinkonutattú í Kaupmannahöfn á dögunum. Nútíminn hefur sérstakan áhuga á frumlegum flúrum og heyrði því í Svanhildi sem sagði okkur söguna á bakvið uppátækið.
„Við ætluðum fyrst að fá okkur nafnið hvor á annarri á rasskinnarnar en svo ákváðum við að hafa þetta eitthvað skemmtilegra en bara nafn,“ segir Svanhildur.
Sjá einnig: Þingmaður lét flúra flokkinn á sig í Hollywood
Þær eru báðar að safna fötum með myndum og mat og ákváðu því að fá sér eitthvað í þeim dúr. „Upp kom sú hugmynd að fá okkur egg, beikon og pönnukökur með sýrópi á rasskinnina en það var of mikið — alltof mikið,“ segir Svanhildur.
Það var þá sem að við ákváðum að fá okkur pitsusneið, einfalt gott og þægilegt. En við vildum hafa bullandi pólítík í þessu og þá kom hugmyndin að illuminati-pitsu upp — vegna þess að Gígja á svoleiðis bol.
Í fyrstu ætluðu þær að láta pitsusneiðarnar á rasskinnarnar en þegar á hólminn kom tímdu þær ekki að fela flúrin.
„Þegar heildarmyndin var komin fannst okkur þetta of flott til að vera falið. Þannig að við ákváðum að skella þeim á lærin,“ segir Svanhildur.