Jón Sigurðsson, forstjóri Össurar, græddi 367 milljónir á sex mínútum þegar hann nýtti sér kauprétt á bréfum í fyrirtækinu og seldi þau samstundis. Þetta kemur fram á vef Viðskiptablaðsins.
Á vef Viðskiptablaðsins kemur fram að stoðtækjaframleiðandinn Össur hafi sent frá sér tilkynningar á danska markaðnum fyrir skömmu þar sem greint var frá viðskiptum Jóns með bréf í félaginu. Hann keypti 1.250.000 bréf af Össuri og seldi strax aftur út á markaðinn.
Sex mínútum eftir kaupin seldi Jón hlutina á talsvert hærra verði en hann keypti þá á. Hann hagnaðist því um 293,7 íslenskar krónur á hvern hlut og heildarhagnaðurinn var rúmlega 367 milljónir króna.
Kaupin voru hluti af kaupréttarsamningi sem Össur og Jón gerðu árið 2012 en samkvæmt frétt Viðskiptablaðsins eru slíkir samningar algengir.