Oddný G. Harðardóttir, formður Samfylkingarinnar, hefur ákveðið að segja af sér formennsku í kjölfar fylgistaps flokksins í þingkosningunum. Logi Einarsson varaformaður flokksins tekur við formennsku í flokknum.
Þetta tilkynnti hún að loknum fundi með Guðna Th. Jóhannessyni, forseta Íslands, á Bessastöðum nú fyrir skömmu.
Þetta kom fram í Síðdegisútvarpinu á Rás 2 að loknum fundi hennar með Guðna.
Í yfirlýsingu Oddnýjar segir hún meðal annars að hún hafi tekið við formennskunni fyrir fimm mánuðum á miklum erfiðleikatímum í flokknum. Ekki hafi náðst að snúa við erfiðri stöðu flokksins á þeim stutta tíma og niðurstaða kosninganna sé henni mikil vonbrigði.
„Afgerandi niðurstöður kosninganna kalla hins vegar á afgerandi viðbrögð. Ég hef því ákveðið að stíga til hliðar sem formaður Samfylkingarinnar,“ sagði hún.