Um hvað snýst málið?
Könnunarfarið Philae hefur lent á halastjörnunni 67P/Churyumov-Gerasimenko. Þetta er í fyrsta sinn sem könnunarfar lendir á halastjörnu.
Lendingarfarið á að endast í að minnsta kosti viku, en vonir standa til að það haldi áfram rannsóknum í einhverja mánuði. Rannsóknargögnin eru send upp í brautarfarið sem endurvarpar þeim til jarðar. Þetta kemur fram á Stjörnufræðivefnum.
Hvað er búið að gerast?
Rosetta ferðast alls rúma sex milljarða kílómetra og er nú um 400 milljónir kílómetra frá jörðinni.
Rosetta er ómannaður rannsóknarleiðangur Geimvísindastofnunar Evrópu (ESA) til halastjörnunnar. Rosetta var skotið á loft 2. mars árið 2004 og fór á braut um halastjörnuna 6. ágúst 2014. Með í för var lendingarfarið sem lenti á halastjörnunni.
Philae er afrakstur samstarfs ESA og stofnana í átta aðildarríkjum þess (Austurríki, Finnland, Frakkland, Ungverjaland, Írland, Ítalía, Bretland, Þýskaland) undir forystu þýsku geimrannsóknarstofnunarinnar (DLR).
Sævar Helgi Bragason stjörnufræðingur, segir lendinguna merkilega, í viðtali á RÚV:
Yfirborðið sem þarna bíður manna er gerólíkt því sem bíður mönnum á öðrum hnöttum á sólkerfinu.
Hvað gerist næst?
Í Philae eru mælitæki sem eiga að gera eins ítarlegar rannsóknir á yfirborðinu og mögulegt er. Rannsóknirnar eiga meðal annars að varpa ljósi á hvernig sólkerfi okkar myndaðist.
Örskýringar eru 200 orða fréttaskýringar Nútímans um mál sem mikið er fjallað um. Sendu okkur póst ef þú ert með hugmynd að örskýringu.