Rithöfundurinn Elísabet Jökulsdótttir skrifar færslu á Facebook síðu sinni þar sem hún segist vera komin með nóg, en árekstur varð við heimili hennar á gatnamótum Hringbrautar og Framnesvegar.
Í færslunni segir hún áreksturinn hafa verið harðan og mildi að enginn hafi slasast í honum. Kennir hún um lélegri hönnun umferðarljósa á gatnamótunum og segist vera komin með nóg.
„Ég ætla ekki að lýsa honum, ég ætla ekki að lýsa lélegri hönnun umferðarljósanna, ég hef gert það oft, (en löggan tók undir þessa lélegu hönnun þegar hún kom) það var mildi að enginn slasaðist, það munaði hársbreidd að annar bílanna keyrði inní hús!“
„Á sama andartaki og þetta gerðist kom sonur minn akandi með tvö kornung börn í bílnum,“ skrifar Elísabet og spyr foreldra í Vesturbæjarskóla, Reykjavíkurborg og skólayfirvöld í Vesturbæjarskóla hvort þeim finnist ástandið í lagi.
„Þið eruð líka búin að fá viðbyggingu sem kostar helmingi meiri umferð.
En jæja ég nenni þessu ekki lengur, þið getið átt við þetta vandamál, ég hef skrifað og kvartað árum saman, nú fer ég að leita mér að öðru húsnæði!!!!
Virðingarfyllst, Elísabet Jökulsdóttir“
Fréttablaðið greindi fyrst frá.