Fasteignafélagið Reginn auglýsir í dag húsnæðið við Smáralind sem áður hýsti Baðhús Lindu Pétursdóttur til leigu. Hægt er að leigja þetta 1.300 fermetra húsnæði í heilu lagi eða að hluta.
Í auglýsingunni kemur fram að möguleikarnir séu endalausir en að aðstaðan henti vel fyrir starfsemi á borð við hvers kyns heilsu- og líkamsrækt, spa, snyrtistofu, yoga og/eða verslun fyrir tengda stafsemi:
Í rýminu er glæsileg móttaka, heitir pottar, gufuböð, stór tækjasalur, þrír æfingasalir, slökunarrými ásamt mögulegri búningaaðstöðu fyrir bæði kynin.
Auglýsinguna má sjá hér:
Athygli vakti þegar Baðhúsið lokaði í desember. Þá sagði Linda að rekstrargrundvellinum hefði verið kippt undan Baðhúsinu strax í byrjun:
„Hingað komu viðskiptavinir okkar í hálfklárað húsnæði með iðnaðarmenn andandi ofan í hálsmálið á þeim og við þurftum í raun að hefja reksturinn á sífelldum afsökunum, afsláttar- og endurgreiðslum og uppsögnum kvenna sem skiljanlega voru ekki sáttar við stöðu mála,“ sagði hún.
Helgi Gunnarsson, forstjóri fasteignafélagsins Regins, svaraði Lindu í Fréttablaðinu og sagðist telja að Reginn hafa staðið við allt sem samið var um.