Sigurður Ingi Þórðarson, betur þekktur sem Siggi hakkari, hefur verið dæmdur í tveggja ára óskilorðsbundið fangelsi. Þá var hann dæmdur til að greiða fjölmörgum aðilum skaðabætur. Dómur var kveðinn upp í Héraðsdómi Reykjaness í morgun.
Sigurður játaði sök í átján ákæruliðum við fyrirtöku málsins á dögunum. Brot Sigurðar voru talin nema rúmlega 30 milljónum króna en ákæran sneri að fjársvikum, fjárdrætti og þjófnaði. Brotin áttu sér stað á tímabilinu 18. mars til 1. júní 2013.
Sigurður þarf að greiða eftirfarandi aðilum skaðabætur: Birni Jóni Bragasyni, Brimborg, Nýherja, Löðri, Hagkaup, Radíóraf, Bónus, Atlantsolíu, Smáralind, SS bílaleigu, Helga Ólafssyni, Ragnari Helgasyni, Fannari Loga Kolbeinssyni, Andrési Magnússyni og Sunshine Press Productions.
Birni Jóni þarf hann að greiða rúmlega 1,1 milljón en Sigurður blekkti Björn Jón til að afsala til sín öllum hlutum í Útgáfufélaginu Sögn ehf. Hann sveik svo út vörur og þjónustu í gegnum félagið.
Skaðabæturnar nema allt frá 46 þúsund krónum upp í tvær og hálfa milljón. Bótakröfum ÁTVR, KFC og ALP var vísað frá dómi.
Á meðal þess sem Sigurður var ákærður fyrir var að svíkja út mat og skyndibita á Dominos, KFC, TGI Fridays, American Style, Argentínu, Subway, Eldsmiðjunni og Greifanum fyrir tugi þúsunda. Þá sveik hann út bílaleigubíla frá Thrifty, Avis, SS bílaleigu og Hertz fyrir milljónir.
Á meðal lúxusbíla sem Sigurður sveik út úr bílaleigunum voru Audi A6, Skoda Superb, Land Rover Discovery, Toyota Land Cruiser, VW Touareg, Hummer H2 og Audi Q5.
Þá sveik hann út iPhone-síma, tölvur, myndavélar og margt annað.
Á Vísi kemur fram að ríkissaksóknari hefur til meðferðar ellefu kynferðisbrotamál gegn Sigurði. Hann var úrskurðaður í gæsluvarðhald í nóvember vegna rannsóknarinnar.
Þá var Sigurður dæmdur í átta mánaða fangelsi í febrúar síðastliðnum fyrir kynferðisbrot gegn 17 ára dreng.