Fótboltakappinn Viðar Örn Kjartansson trúlofaðist kærustu sinni, Thelmu Rán Óttarsdóttur, í helgarferð á Kanarí um síðustu helgi.
Viðar Örn segir í samtali við DV að það þau hafi bæði vitað að tímaspursmál hafi verið hvenær þetta myndi gerast:
Ég skellti mér á skeljarnar á rómantískum veitingastað á eyjunni. Það þarf að vera eitthvað rómantískur líka.
Viðar Örn hefur verið aðalmaðurinn í Noregi frá því að hann hóf að spila með Vålerenga í norsku úrvalsdeildinni í fótbolta.
Hann var markahæstur á síðustu leiktíð með 25 mörk, kosinn besti framherji deildarinnar, valinn í lið ársins og valinn besti leikmaður deildarinnar af Nettavisen.
Þá hefur hann verið eftirsóttur hjá fyrirtækjum í Noregi og Nútíminn greindi frá því að heitur pottur hafi verið nefndur í höfuðið á honum. Loks sendi hann frá sér Creed-slagara til að styrkja liðið sitt en lagið komst á lista yfir vinsælustu lög Noregs.
Viðar hefur gert nýjan samning við Vålerenga. Samningurinn er einn sá stærsti sem Íslendingur hefur gert í Noregi, samkvæmt heimildum Vísis.