Rapparinn Erpur Eyvindarson eða Blaz Roca eins og margir kalla hann, mun halda uppi stuðinu á skemmtistaðnum Manhattan í Nuuk, höfuðborg Grænlands um helgina. Þar mun hann henda í vel valdar rímur fyrir mannskapinn.
„Menn hafa verið að sækja í hitann og exótíkina til Benidorm en núna er aðalexótíkin á Íslandi og Norður-Noregi. Það segir sig sjálft með fullri virðingu fyrir því hvað lundabúðirnar bjóða upp á gott úrval af norskum skógartröllum á Laugaveginum að það er langbest að fara bara alla leið til Grænlands,“ segir Erpur í viðtali við Lovísu Rut Kristjánsdóttur í Popplandi rétt áður en hann hélt til Grænlands.
Hann bætir við að það sé mun auðveldara að komast til Grænlands en fólk haldi. Fólk sé vant því að þurfa að keyra til Keflavíkur þegar það yfirgefur landið en það sé flogið til Grænlands beint frá Reykjavíkurflugvelli.
„Ég ætti reyndar ekki að segja frá þessu í útvarpi því ég veit að allir vinir mínir sem eru blindfullir og fá þá flipphugmynd að fljúga eitthvert hætta alltaf við því þeir nenna ekki til Keflavíkur með leigubíl. Til þess að fljúga til Grænlands er nóg að labba úr miðbænum,“ segir Erpur. „Það er því hægt að fá frábæra hugmynd í „blakkáti“ eins og Miðflokkurinn þekkir best.“
En það verður ekki einungis tónlistarveisla þar í landi um helgina heldur fer einnig fram grænlensk-kóreskur menningaratburður og með í för verður Atli Snær vinur Erps sem rekur veitingastaðinn Kore. Ætlar hann að elda kóreskan mat með grænlensku ívafi fyrir gestina og mun Erpur troða upp þegar allir hafa borðað nægju sína. Fer gleðin fram á laugardaginn á Manhattan skemmtistaðnum sem er í senn næturklúbbur og veitingastaður.
Hægt verður að fylgjast með ferðalaginu á Instagram- og Snapchat-rásum Erps þar sem hann færir fregnir af ævintýrinu í rauntíma.
Þetta kom fram á vef RÚV.