Um tíu þúsund kleinuhringir seljast á kaffihúsi Dunkin’ Donuts á Laugavegi á hverjum degi. Raðir hafa myndast fyrir utan staðinn daglega síðan hann opnaði og fyrirhugað er að opna tvo nýja staði fyrir áramót. Þetta kemur fram í Morgunblaðinu í dag.
Sjá einnig: Fremst í Dunkin’ Donuts-röðinni: „Maður er enn þá volgur eftir Eyjar“
Þessar ótrúlegu viðtökur komu Árna Pétri Jónssyni, forstjóra 10-11 og Iceland, lítið á óvart. Í Morgunblaðinu segir hann að þetta sé reynslan af opnun staðanna um allan heim.
„Fulltrúar Dunkin’ Donuts voru búnir að segja mér að þetta yrði svona, vegna þess að þetta er það sem hefur gerst úti um allan heim,“ segir Árni í Morgunblaðinu.
Í þremur síðustu opnunum hjá þeim, sem voru í Vínarborg, Stokkhólmi og Kaupmannahöfn, beið fólk meira en sólarhring fyrir utan og yfir hundrað manns biðu í röð. Það seldust á bilinu 10-14 þúsund kleinuhringir á dag. Og fyrstu 7-8 dagana voru biðraðir.
Í frétt Morgunblaðsins kemur fram að áætlað sé að opna tvo nýja staði fyrir áramót, eitt kaffihús og einn inni í 10-11 verslun eða Skeljungsbensínstöð. Nýi staðurinn verður að sögn Árna ekki í miðbænum.