Eyjan Vigur í Ísafjarðardjúpi er til sölu eins og hún leggur sig.
„Svona eyja kemur nánast aldrei í sölu þannig að þetta er einstakt tækifæri,“ segir Davíð Ólafsson fasteignasali í samtali við Nútímann.
Hann segir símann ekki hafa stoppað síðan eyjan fór í sölu klukkan 11 í morgun. „Ég er búinn að fá símtöl alls staðar að úr heiminum en við skoðum öll tilboð í rólegheitum,“ segir Davíð.
Eyjan er 45 hektarar og húsakostur er yfir 700 fermetrar.
Mikið dýralíf er í eyjunni en þar verpa einstaklega gæfar teistur og mörg þúsund lundar og kríur. Þar er einnig mikið æðarvarp og kindur á beit.
„Þetta er algjör paradís.“
Rúmlega tíu þúsund manns heimsækja eyjuna á hverju ári og Davíð segir marga möguleika fyrir vaxandi ferðamennsku vera fyrir hendi.
Aðspurður segir Davíð eyjuna kosta það sem einhver vilji borga fyrir hana en verðið sé í kringum 300 milljónir.