Raunveruleikaþátturinn Biggest Loser Ísland hefur göngu sína á ný á Skjá einum í janúar. Eyþór Árni Úlfarsson, einn af keppendunum í fyrstu þáttaröðinni, snýr aftur.
Eyþór Árni var var þyngsti keppandinn í fyrstu þáttaröð Biggest Loser og næst þyngsti keppandinn í sögu þáttarins, sem hefur verið framleiddur víða um heim. Eyþór var 249 kíló þegar hann keppti fyrst en er nú 211 kíló.
Í viðtali á Mbl.is segir hann að eigin hindranir séu það erfiðasta í þáttunum. „Þær sem maður setur sjálfur fyrir sig. Að hafa ekki trú á sjálfum sér og gera sjálfum sér hlutina erfiðari en þeir þurfa að vera,“ segir hann.
Þá segir hann að fólk hafi mismikinn skilning á því hvað það er að vera of feitur.
Þetta er almennt litið miklu hornauga og fólk virðist ekki alveg skilja hvað það er í raun erfitt að vera feitur og geta ekki losnað úr þessum vítahring.
Hann stefnir á að létta sig niður í 100 til 110 kíló og ráðleggur þeim sem eru í hans sporum að byrja á matarræðinu og smá hreyfingu.
„Ekki reyna að „gleypa heiminn“. Það er ótrúlegt hvað mikið hefst upp úr því að bara byrja á að sleppa öllu nammi og gosi og fara bara út að labba rösklega í svona hálftíma á dag,“ segir hann.