Sigurjón M. Egilsson, nýráðinn fréttaritstjóri 365 og stjórnandi Sprengisands á Bylgjunni, var fluttur á sjúkrahús í gær eftir fall á vespu. Sigurjón var að fara inn í hringtorg við Korputorg þegar vespan rann til á veginum. Fimm rifbein og herðarblaðið í Sigurjóni brotnuðu við fallið ásamt því að lungun féllu saman.
Hildur Sif Kristborgardóttir, stjúpdóttir Sigurjóns, segir að hann sé brattur miðað við allt en samt mikið slasaður. „Hann er rosa seigur og búinn að redda afleysingu í Sprengisand á sunnudaginn,“ segir hún.
Sigurjón er á hjarta- og lungnadeild á Hringbraut með slöngu ofan í lungu og verður þar næstu daga. Hann var með hjálm og í hlífðarfatnaði þegar hann datt sem bjargaði því sem bjargað var, að sögn Hildar. „Hjálmurinn er ónýtur — allur úti í djúpum rispum,“ segir hún.