Pylsurnar kláruðust ekki í Staðarskála í nótt þrátt fyrir að á milli 3-400 manns hafi verið veðurteppt í Hrútafirðinum. Holtavörðuheiðin var lokuð og tveir ráðherrar voru á meðal þeirra sem sátu fastir.
Snorri Hallgrímsson í Staðarskála segir í samtali við Nútímann að pylsurnar sem seldust í nótt hafi ekki verið taldar, en nóg hafi verið til. „Til samanburðar þá seljast um 600 pylsur á góðum nýársdegi. Okkur bregður ekkert þó við sjáum fólk hérna,“ segir hann.
Snorri segir góða stemningu hafa verið í Staðarskála og að salan á bjór hafi verið góð, þó hann hafi ekki klárast.
Samkvæmt björgunarsveitum gistu um 340 manns á opinberum stöðum í Hrútafirði og eflaust fleiri í heimahúsum.
Gunnar Bragi Sveinsson utanríkisráðherra og Illugi Gunnarsson menntamálaráðherra voru á meðal þeirra sem voru veðurtepptir í Staðarskála. Ljóst er að meiri völd hafa sjaldan verið föst í Hrútafirðinum. „Veðrið spyr ekkert hverjir eru á ferð,“ segir Snorri.
Illugi segir í samtali við mbl.is að hann hafi komið ásamt föruneyti þegar nýbúið var að loka heiðinni:
Þegar við keyrðum þar yfir í morgun prísuðum við okkur sæla að hafa ekki farið þarna upp eftir. Í morgun sáum við að margir bílar hefðu farið á hliðina og margir jafnframt fest sig.
Gunnar Bragi sagðist í færslu á Facebook hafa verið veðurtepptur í nokkrar klukkustundir í Staðarskála. „[Það er] ófært í báðar áttir en mikið fjör og hellingur af fólki á staðnum,“ sagði hann.
Holtavörðuheiðin opnaði rétt fyrir klukkan átta í morgun.