Tónleikagestir á tónleikum Arcade Fire í Laugardalshöll síðastliðið þriðjudagskvöld kvörtuðu nokkrir yfir því að engin skipting hefði verið á tónleikasvæðinu. Fyrir tónleikana var hægt að kaupa miða á A og B svæði, miðinn á A svæði var dýrari. Tónleikahaldarinn Þorsteinn Stephensen hefur ný útskýrt hvers vegna svæðin voru sameinuð.
Hann birti yfirlýsingu á Facebook síðu Hr. Örlygs þar sem hann segir að einungis 79 miðar hefðu selst á B svæðið en 4000 miðar á A svæðinu. Því hefðu það orðið mikil mistök að halda því fyrirkomulagi sem upphaflega var ákveðið.
Svæðið var sett upp fyrir um 6500 manns og skyndiákvörðun hafi verið að stytta og þrengja salinn og sleppa B svæðinu. Þeir 79 sem hafi keypt miða á það svæði hafi því fengið óvæntan glaðning. Hann segist ekki hafa átt von á ósætti vegna málsins en skilur þá aðila vel sem hafa kvartað.
„Það var hins vegar ekki þannig að þeir sem keyptu miða á A svæði hafi verið hlunnfarnir. Það voru einfaldlega þessar 79 manneskjur sem keyptu miða á B svæði sem fengu meira en þau áttu von á og slíkt getur gerst við ýmis tilefni t.d. þegar maður fær óvænt betra sæti í flugvél en það sem greitt var fyrir.”
Þá talar hann um hversu vel tónleikarnir sjálfir hafi tekist og segir þá vera einu þá bestu í Íslandssögunni. Færslu Þorsteins má sjá hér að neðan.
Sjá einnig: Söngvari Arcade Fire með DJ-sett á Húrra