Um hvað snýst málið?
Íslenska þjóðfylkingin mótmælti nýjum útlendingalögum á Austurvelli á mánudag. Í samantekt um lögin á vef Alþingis kemur fram að tilgangur þeirra sé að tryggja mannúðlega og skilvirka meðferð stjórnvalda í málefnum útlendinga hér á landi.
Hvað er búið að gerast?
Meðlimir Íslensku þjóðfylkingarinnar hafa tekið undir málflutning Jóns Magnússonar lögmanns sem sagði í Sprengisandi í Bylgjunni í júní að með nýjum lögum „missum við gjörsamlega tök og stjórn á landamærum þessa lands.“
Ekkert sem bendir til þess er hins vegar að finna í breytingunum á útlendingalögum sem mótmælin snerust um. Í lögunum frá 2002 er hins vegar að finna kafla um landamæraeftirlit, dvalarleyfi flóttafólks ásamt skilgreiningu á flóttamannahugtakinu.
Þau sem leggjast gegn lögunum hafa lýst yfir áhyggjum af því að þar sé ekkert fjallað um öryggi ríkisins. Í nýju lögunum er hins vegar sérstakur kafli sem fjallar um öryggi ríkisins.
Í samantekt um breytingarnar á útlendingalögunum á vef Alþingis kemur fram að þær eigi að stuðla að aukinni þjónustu við útlendinga, sérstaklega umsækjendur um alþjóðlega vernd, erlenda sérfræðinga, námsmenn og rannsakendur.
Sérstök áhersla var lögð á að bæta réttarstöðu barna, sérstaklega fylgdarlausra barna, sem sækja um vernd hér á landi.
Hvað gerist næst?
Ný útlendingalög voru samþykkt í júní og taka gildi 1. janúar 2017. Engar líkur eru á því að þau tortími Íslandi.
Örskýringar eru 200 orða fréttaskýringar Nútímans um mál sem mikið er fjallað um. Sendu okkur póst ef þú ert með hugmynd að örskýringu.