Skoski leikarinn Gerard Butler er staddur hér á landi. Sást til hans í miðbænum í nótt þar sem hann sótti meðal annars skemmtistaðinn Kaffibarinn. Þetta kemur fram á Mbl.is.
Butler hefur leikið í myndum á borð við 300 og Beowulf. Það ætti ekki að koma á óvart að hann millilendi hér á leið sinni yfir hafið en var á dögunum staddur í Lundúnum. Butler hefur nefnilega sagt að Ísland sé einn af uppáhaldsstöðunum sínum:
Það er eitthvað við Ísland – harðneskja. Það er eitthvað afar frumstætt í umhverfinu, eitthvað óútskýranlegt sem hefur áhrif á mig þegar ég stend þar. Maður fer yfir jökla eða stendur á svartri sandströndu. Maður stendur á tindi eldfjalls og það leggur gufu upp úr jörðinni í kringum þig. Þarna eru hverir; maður sér þessa hluti hvergi annars staðar. Og fólkið er mjög andlega sinnað.
Þá er fræg sagan af því þegar hann var að leika í Beowulf og bað Guðna Ágústsson, þáverandi landbúnaðarráðherra, um samloku með skinku og osti.
„Út kom þá maður í jakkafötum og með bindi og ég taldi nánast öruggt að þetta væri framkvæmdastjóri hótelsins. Ég vatt mér upp að honum, spurði hvort hann gæti ekki reddað mér einhverju að borða, það mætti væri hvað sem er, bara samloka með skinku og osti. Ég var að deyja úr hungri, ég hefði getað torgað heilu hrossi,“ sagði Butler í viðtali um málið sem hann kallar eitt af vandræðalegri augnablikum lífs síns.
Butler segir að framleiðendur myndarinnar hafi strax komið að máli við sig og tilkynnt honum að þarna hefði hann verið að biðja landbúnaðarráðherra landsins um mat.