Louise Soreda, franska konan sem lýst var eftir í gær og leitað er að, gisti í tvær nætur á gistiheimili í vesturbæ Reykjavíkur eftir að hún kom til landsins 5. júlí.
Á öryggismyndavélum við gistiheimilið sést til hennar með karlmanni. Louise bókaði herbergið fyrir sig eina í júní. Þetta kemur fram í frétt Vísis sem segist hafa heimildir fyrir þessu.
Sjá einnig: Louise fór með rútu til Reykjavíkur eftir komuna til Íslands, fjölskyldan vissi ekki af ferðinni
Jón Halldór Sigurðsson, lögreglumaður hjá lögreglunni á Suðurlandi, staðfestir í samtali við Vísi að Louise sé talin vera með ferðafélaga. Lögreglan hefur fengið fjölda ábendinga vegna málsins og er konan ýmist sögð á ferð með annarri konu eða karlmanni. Hún kom aftur á móti ein til landsins.
Slökkt hefur verið á farsíma Louise í nokkra daga. Þá hefur hún ekki notað greiðslukort hér á landi. Louise á ekki pantaðan flugmiða frá landinu.
Síðast þegar sást til hennar var hún klædd bláum gallabuxum, brúnum fjallgönguskóm og hvítri peysu. Þá hafði hún meðferðis stóran rauðan bakpoka ásamt upprúllaðri ljósgrárri dýnu, eins og sést á meðfylgjandi mynd.
Þau sem hafa upplýsingar um hvar Louise er niðurkomin, eða hafa séð hana, eru vinsamlegast beðin um að hafa samband við lögregluna á Suðurnesjum í síma 444 2200. Einnig er hægt að hafa samband í gegnum Facebook-síðu lögreglunnar á Suðurlandi.